செய்திகள் வாசிப்பது நீங்கள்

செய்தி : 1

இந்தியாவின் மிகப் பெரிய புலிகள் சரணாலயங்களில் ஒன்றான ரந்தம்போர் புலிகள் சரணாலயம், அதிக அளவிலான சுற்றுலா பயணிகளை ஈர்த்து  வருகிறது. மிக எளிதில் புலிகளை நேரில் பார்த்துவிட முடியும். இந்த புலிகள் சரணாலயத்திற்குள் கட்டப்பட்டு வரும் அணைகள் மற்றும் நீர் தேக்கங்கள், வன விலங்குகளுக்கு அச்சுறுத்தல் ஏற்படுத்தும் விதமாக இருப்பதால் அவற்றை உடனே நிறுத்த வேண்டும் என்று உச்ச நீதி மன்றம் தீர்ப்பு வழங்கியுள்ளது. கன ரக வாகனங்களை வனத்துக்குள் ஓட்டி செல்வதாலும், அணை கட்டும் போது ஏற்படும் இடயூறுகளாலும் வன விலங்குகளுக்கு பாதிப்பு ஏற்படாமல் இருக்க வேண்டும் என்ற நோக்கில், வன விலங்குகள் பாதுகாப்பு சட்டத்தின் படி, தற்சமயம் நடந்து கொண்டிருக்கும், கட்டுமான பணிகளை உடனே நிறுத்த வேண்டும் என்ற தீர்ப்பை வழங்கியுள்ளது. மாநில அரசுகள், ஒரு திட்டத்தை கொண்டு வரும் போது, அது வன விலங்குகளை பாதிக்காத வண்ணம் செயல்படுத்த வேண்டும். புலிகள் சரணாலயத்திற்கு உட்பட்ட பகுதிகளில் இது போன்ற பணிகள் நடந்தால், நிச்சயம் அது விலங்குகளை பாதிக்கும் என்பதை உணர வேண்டும்.

செய்தி : 2

வனப் பகுதிகள் ஏற்கனவே தீவுகள் போல மாறிவிட்ட இன்றைய சூழ்நிலையில், விலங்குகள் ஒரு பகுதியில் இருந்து மற்றொரு பகுதிக்கு செல்வது மிகவும் கடினமான காரியமாக மாறிவிட்டது. இனப்பெருக்க காலங்களிலோ, அல்லது பருவ மாற்றங்களின் போதோ, அல்லாது தண்ணீர், உணவு தேவைகளுக்காகவோ, புலிகள் இடம் மாறுவதுண்டு. வனங்களை இணைக்கும் சில பகுதிகள் மனிதர்களால் ஆக்கிரமிக்கப் படுவதால் அவை இடையூறின்றி வேறு வனப்பகுதிக்கு செல்வதில் சிக்கல் ஏற்ப்படுகிறது. இந்நிலையில் இது போன்ற பகுதிகளை பாதுகாப்பது முடியாது என்று, மத்திய சுற்றுச் சூழல் அமைச்சர் ஜெய் ராம் ரமேஷ் கூறியுள்ளார். பாதுகாக்கப்பட்ட வனப் பகுதி எவ்வளவு முக்கியமோ அதே போல, விலங்குகள் செல்லும் பாதைகளும் பாதுகாக்கப் பட வேண்டும். அது முடியாது என்று அமைச்சரே கூறுவது, வேதனையான விஷயம்.

செய்தி : 3

இந்தியாவில் தற்போது செயல்படும் 39 புலிகள் காப்பகனகள் அல்லாது, மேலும் 5 வனப் பகுதிகளை புலிகள் காப்பகங்களாக அறிவிக்க மத்திய சுற்றுச் சூழல் அமைச்சகம் முடிவு செய்துள்ளது. ஆனால் இன்னும் முழுமையாக நடைமுறை படுத்தப்படவில்லை. அவை:

பிளிபித், உத்தர பிரதேஷ்
பிலிகிரி ரங்கன் பெட்டா, கர்நாடகா
சுனபெடா, ஒரிசா
ரடபணி, மத்திய பிரதேஷ்
முகுன்றா, ராஜஸ்தான்