காட்டுமாடுகள்

அயல் மரச்செறிவுகளிடையே

வாழிடம் இழந்த காட்டுமாடுகள்,

நகருக்குள் வாழப்பழகிவிட்டன.

ஏரிச்சாலையில்

கன்றுகளோடு சுற்றித்திரிகிற

காட்டுமாடுகளை,

ஒளிப்படம் எடுக்கும் ஒருவன் 

காட்டெருமை என்கிறான்.

பேருந்திலிருந்து தலையை நீட்டி

பைசன் எனக் கூச்சலிடுகிறார்கள்

குழந்தைகள்.

பெயரிலும் அடையாளம் தொலைத்தவை,

சோளக்கருதை குப்பையில் 

தேடித்திரிகின்றன.